நாடு திரும்பினார் பிரதமர் ஹரிணி அமரசூரிய
சுவிட்சர்லாந்தின் டாவோஸ் நகரில் நடைபெற்ற 2026 உலகப் பொருளாதார மன்றத்தில் கலந்துகொண்ட பிரதமர் கலாநிதி ஹரிணி அமரசூரிய தலைமையிலான தூதுக்குழுவினர், 4 நாள் உத்தியோகபூர்வ பயணத்தை முடித்துக்கொண்டு இன்று (ஜனவரி 23) காலை நாடு திரும்பினர்.
பிரதமர் சர்வதேச நாணய நிதியத்தின் (IMF) முகாமைத்துவப் பணிப்பாளர் கிறிஸ்டலினா ஜோர்ஜீவா மற்றும் ஆசிய அபிவிருத்தி வங்கியின் (ADB) தலைவர் மசாட்சுகு அசகாவா ஆகியோருடன் நிதி ஸ்திரத்தன்மை குறித்து கலந்துரையாடினார்.
சிங்கப்பூர் அதிபர் தர்மன் சண்முகரத்தினம், ஐரோப்பிய ஆணையத்தின் தலைவர் உர்சுலா வான் டெர் லேயன் மற்றும் ஐக்கிய நாடுகள் அபிவிருத்தித் திட்டத்தின் (UNDP) நிர்வாகி ஆகியோருடன் இருதரப்பு பேச்சுவார்த்தைகளை நடத்தினார்.
‘உலகப் பெண்கள் டாவோஸ் நிகழ்ச்சி நிரல் 2026’ இல் பிரதமர் சிறப்புரையாற்றினார்.
வளர்ந்து வரும் சந்தைகளில் வேலைவாய்ப்பு நெருக்கடி மற்றும் உலகளாவிய சுற்றுலாத்துறை மேம்பாடு குறித்த உயர்மட்டக் குழு விவாதங்களிலும் அவர் பங்கேற்றார்.
AP Moller-Maersk போன்ற சர்வதேச நிறுவனங்களின் தலைவர்கள் மற்றும் சுவிட்சர்லாந்து வர்த்தக சமூகத்துடன் முதலீட்டு வாய்ப்புகளை விரிவுபடுத்துவது குறித்து கலந்துரையாடினார்.
இந்த விஜயத்தில் தொழிலாளர் அமைச்சர் மற்றும் நிதி, திட்டமிடல் பிரதி அமைச்சர் கலாநிதி அனில் ஜெயந்த பெர்னாண்டோ உள்ளிட்ட உயர்மட்டக் குழுவினர் பங்கேற்றனர்.
இந்த இராஜதந்திர விஜயமானது இலங்கையின் எதிர்கால அபிவிருத்திக்கான சர்வதேச ஒத்துழைப்பில் ஒரு புதிய அத்தியாயத்தைத் திறந்துள்ளதாக பிரதமரின் ஊடகப் பிரிவு தெரிவித்துள்ளது. மேலதிக விபரங்களுக்கு இலங்கை பிரதமரின் உத்தியோகபூர்வ இணையதளத்தைப் பார்வையிடலாம்.
