சாக்லேட் பைகளுக்குள் கைபேசி கடத்தல்: கட்டுநாயக்கவில் 3 சீனர்கள் சிக்கினர்!

சீனாவின் ஷாங்காய் நகரில் இருந்து நேற்று (19) இரவு 06.43 மணிக்கு ‘சைனா ஈஸ்டர்ன் ஏர்லைன்ஸ்’ (China Eastern Airlines) நிறுவனத்திற்குச் சொந்தமான MU-6017 என்ற விமானம் மூலம் சந்தேக நபர்கள் கட்டுநாயக்க, பண்டாரநாயக்க சர்வதேச விமான நிலையத்தை வந்தடைந்துள்ளனர். கைது செய்யப்பட்டவர்களில் 34 வயதுடைய சீனப் பெண் ஒருவரும், 35 வயதுடைய இரண்டு ஆண்களும் அடங்குவதாக அதிகாரிகள் தெரிவித்துள்ளனர்.

விமான நிலையத்தின் வருகை முனையத்தில், எதையும் அறிவிக்கத் தேவையில்லாத ‘பசுமை வழித்தடம்’ (Green Channel) வழியாக இந்த சந்தேக நபர்கள் வெளியேற முயற்சித்துள்ளனர். இதன்போது, முதலாவதாக நுழைந்த சீனப் பயணி, விமான நிலைய வரிவிலக்கு வணிக வளாகத்தினால் (Duty-Free) வழங்கப்படும் பாலித்தீன் பைகளுக்குள், மற்றொரு கருப்பு நிற ‘துலிப்’ வகை பாலித்தீன் பையை மறைத்து வைத்திருந்ததை சுங்க அதிகாரிகள் அவதானித்துள்ளனர்.

அவரது நடத்தையில் ஏற்பட்ட சந்தேகத்தின் பேரில் சுங்க அதிகாரிகள் அந்தப் பையைச் சோதனையிட்டபோது, சாக்லேட்டுகள் மற்றும் டாஃபிகளுக்கு (Toffees & Chocolates) இடையில் மிகவும் நுணுக்கமாக மறைத்து வைக்கப்பட்டிருந்த கைபேசிகளின் முதற்கட்டத் தொகுதி கண்டுபிடிக்கப்பட்டது.

சந்தேக நபர்களிடமிருந்து மொத்தம் 87 கைபேசிகளும் (Mobile Phones), 140 மின்கலன்களும் (Batteries) சுங்க அதிகாரிகளால் பறிமுதல் செய்யப்பட்டுள்ளன.

சுங்கத்துறையினரின் காவலில் வைக்கப்பட்டு, மேலதிக விசாரணைகள் தீவிரமாக முன்னெடுக்கப்பட்டு வருகின்றன.