வனவிலங்கு பாகங்கள் விற்பனை: பொரெல்லா மற்றும் பாணந்துறையில் மூவர் கைது!
வனவிலங்குகளின் பாகங்கள் மற்றும் அவற்றிலிருந்து தயாரிக்கப்பட்ட நகைகளைச் சட்டவிரோதமாகப் பதுக்கி வைத்து விற்பனை செய்ய முயன்ற மூவர், பொரெல்லா மற்றும் பாணந்துறை பகுதிகளில் வைத்து கைது செய்யப்பட்டுள்ளனர். வனவிலங்கு அதிகாரிகள் மற்றும் பொலிஸ் விசேட அதிரடிப்படையின் புலனாய்வுப் பிரிவினர் இணைந்து இந்த நடவடிக்கையை மேற்கொண்டனர்.
இந்தச் சோதனையின் போது, யானைத் தந்தங்களால் செய்யப்பட்ட எட்டு கோப்பைகள், ஒரு யானை முத்து மாலை, கைக்காப்பு மற்றும் பேழை, இரண்டு அடி நீளமுள்ள ஒரு போலித் தந்தம், யானை முத்துக்களால் செய்யப்பட்டிருக்கலாம் என சந்தேகிக்கப்படும் இரண்டு கைக்காப்புகள், ஐந்து சிறுத்தைப் பற்கள், இரண்டு சிறுத்தைத் தோல்கள், மூன்று கடல் சிப்பிகள், இரண்டு புள்ளிச் சங்குகள், ஒரு மான் கொம்பு மற்றும் இரண்டு கருப்பு பவளத் துண்டுகள் உள்ளிட்ட கணிசமான பொருட்கள் கைப்பற்றப்பட்டுள்ளன.
இலங்கை விமானப்படையால் வழங்கப்பட்ட உளவுத் தகவலுக்கு அமைய, குருநாகல் வனவிலங்கு உதவிப் பணிப்பாளர் அலுவலகம், புலத்கொகுப்பிட்டிய வனவிலங்கு அலுவலகம், அட்டிடியா வனவிலங்கு அலுவலகம் மற்றும் ராஜகிரிய பொலிஸ் புலனாய்வுப் பிரிவினர் கூட்டாக இந்தச் சோதனையை முன்னெடுத்தனர். சந்தேக நபர்கள் மற்றும் வழக்கு ஆவணங்கள் மாளிகாகந்த மற்றும் பாணந்துறை நீதவான் நீதிமன்றங்களில் ஆஜர்படுத்தப்படவுள்ளதாக வனவிலங்கு அதிகாரிகள் தெரிவித்தனர்.
