ஐரோப்பாவை உலுக்கிய வெப்ப அலை குறித்து அதிர்ச்சி தகவல்.

ஜெர்மனியின் பிரதான பொது சுகாதார நிறுவனம் வியாழக்கிழமை அன்று வெளியிட்ட அறிவிப்பில், இந்த ஆண்டு இதுவரை நாட்டில் குறைந்தது 5,120 பேர் வெப்பம் தொடர்பான காரணங்களால் உயிரிழந்துள்ளதாகவும், அவர்களில் பெரும்பாலானோர் ஒரு வாரத்திற்கும் மேலாக ஐரோப்பாவை முடக்கிய ஜூன் மாத வெப்ப அலையின் போது உயிரிழந்தவர்கள் என்றும் தெரிவித்துள்ளது.

அந்த மரணங்களில் சுமார் 4,270 பேர் 75 வயது மற்றும் அதற்கு மேற்பட்டவர்கள் என்று ராபர்ட் கோச் நிறுவனம் (RKI) தெரிவித்துள்ளது.

ஜூன் மாத இறுதியில், நாட்டின் சில பகுதிகளில் வெப்பநிலை 40 டிகிரி செல்சியஸை (104 டிகிரி ஃபாரன்ஹீட்) தாண்டியது. ஜெர்மனியில் உள்ள பெரும்பாலான கட்டிடங்கள், இத்தகைய அதிக வெப்பநிலையைத் தாங்கும் வகையில் கட்டப்படவில்லை; பல மருத்துவமனைகள் மற்றும் முதியோர் இல்லங்களில் இன்னும் குளிரூட்டும் வசதி இல்லை.

பிரான்சில் ஜூன் மாத வெப்ப அலை காரணமாக ஆயிரக்கணக்கானோர் கூடுதலாக உயிரிழந்ததாகவும், ஸ்பெயின், நெதர்லாந்து மற்றும் பெல்ஜியத்தில் நூற்றுக்கணக்கானோர் உயிரிழந்ததாகவும் அந்நாட்டு அதிகாரிகள் தெரிவித்தனர்.

1991-2020 சராசரியை விட 3 டிகிரி செல்சியஸுக்கும் அதிகமாக, இதுவரையிலான ஜூன் மாதங்களிலேயே இதுதான் மிகவும் வெப்பமான மாதம் என ஐரோப்பிய ஒன்றியத்தின் கோப்பர்நிக்கஸ் காலநிலை மாற்ற சேவை வெளியிட்ட அறிக்கை வெளியான அதே நாளில் இந்தச் செய்தியும் வந்தது.

கோப்பர்நிக்கஸின் காலநிலை மாற்றத்திற்கான மூலோபாயத் தலைவரான சமந்தா பர்கஸ், அதிகரித்து வரும் காற்று மற்றும் கடல் வெப்பநிலையானது, சிக்கிக்கொண்ட “வெப்பக் குவிமாடங்களை” தொடர்ந்து உருவாக்கும் என்றும், அதன் விளைவாக நீண்ட, தீவிரமான மற்றும் அதிக உயிரிழப்புகளை ஏற்படுத்தக்கூடிய வெப்ப அலைகள் உருவாகும் என்றும் வலியுறுத்தினார்.

புதைபடிவ எரிபொருட்களை எரிப்பதால் ஏற்படும் மனிதனால் தூண்டப்பட்ட காலநிலை மாற்றம் இல்லாமல், கடந்த மாதத்தின் சாதனை அளவிலான வெப்பம் ஏற்பட்டிருக்க “கிட்டத்தட்ட சாத்தியமற்றது” என்று விஞ்ஞானிகள் கூறியுள்ளனர்