8 விக்கெட்டுகள் வித்தியாசத்தில் இலங்கையை வீழ்த்திய இங்கிலாந்து!

இங்கிலாந்துக்கு சுற்றுலா மேற்கொண்டுள்ள இலங்கை அணிக்கும் இங்கிலாந்துக்கும் இடையிலான 3 போட்டிகள் கொண்ட டி20 தொடரை 3-0 என இங்கிலாந்து அணி இன்று (19) முழுமையாகக் கைப்பற்றியுள்ளது.

இதன்படி, மான்செஸ்டரின் ஓல்ட் டிராஃபோர்ட்டில் (Old Trafford) இன்று (19) நடைபெற்ற மூன்றாவது போட்டியில் இலங்கை அணி 8 விக்கெட்டுகள் வித்தியாசத்தில் தோல்வியடைந்தது.

போட்டியின் நாணய சுழற்சியில் வெற்றி பெற்ற இங்கிலாந்து அணியின் அழைப்பின் பேரில் முதலில் துடுப்பெடுத்தாடிய இலங்கை அணி 18.5 ஓவர்களில் அனைத்து விக்கெட்டுகளையும் இழந்து 124 ஓட்டங்களை மட்டுமே பெற்றது.

இலங்கை அணி சார்பில் பெத்தும் நிஸ்ஸங்க 24 பந்துகளில் 36 ஓட்டங்களையும், கமிந்து மெண்டிஸ் 28 பந்துகளில் 35 ஓட்டங்களையும் பெற்றனர்.

பந்துவீச்சில் இங்கிலாந்தின் சொனி பேக்கர் (Sonny Baker), ஜோஃப்ரா ஆர்ச்சர் (Jofra Archer) மற்றும் வில் ஜாக்ஸ் (Will Jacks) ஆகியோர் தலா 2 விக்கெட்டுகளை வீழ்த்தினர்.

125 ஓட்டங்கள் என்ற இலகுவான இலக்கை நோக்கி பதிலளித்தாடிய இங்கிலாந்து அணி 9.4 ஓவர்களில் 2 விக்கெட்டுகளை மட்டுமே இழந்து 126 ஓட்டங்களைப் பெற்று வெற்றியை உறுதி செய்தது.

அதிரடியாகத் துடுப்பெடுத்தாடிய ஜோஸ் பட்லர் (Jos Buttler) 32 பந்துகளில் 7 நான்கு ஓட்டங்களையும் 2 ஆறு ஓட்டங்களையும் பெற்று மொத்தமாக 62 ஓட்டங்களைப் பெற்றுள்ளார்.

தலைவர் ஹரி புரூக் (Harry Brook) 33 ஓட்டங்களையும் பெற்றுள்ளார்.

இதன்படி, 62 பந்துகள் (10.2 ஓவர்கள்) மீதமிருந்த நிலையில் பெற்ற இந்த வெற்றியுடன், இங்கிலாந்து அணி தொடரை 3-0 என முழுமையாகக் கைப்பற்றியது.